प्रदेश

बाराको निजगढमा भमरा टोलमा श्रीमानले श्रीमतीको खुर्पा प्रहार गरेर हत्या गरेका छन् । निजगढ नगरपालिका ९ भमरा टोलमा मंगलबार राति । शौच गर्न बसेकी ३८ वर्षीया लक्ष्मी राईलाई उनका श्रीमान् ४२ वर्षीय बिमल बस्नेतले घाँटीमा खुर्पा प्रहार गर्दा घटनास्थलमै मृत्यु भएको निजगढ इलाका प्रहरी कार्यालयका प्रहरी निरीक्षक सुमित कुशवाहाले बताए। बिमलको खुर्पा प्रहारबाट उनकी २ छोरी १७ वर्षीया गंगा राई र जमुना राई समेत घाइते भएको प्रहरीले जनाएको छ।

हेटौंडा:बागमती प्रदेशको उद्योग वाणिज्य भूमि तथा प्रशासन मन्त्रालय र मातहतका कार्यालय अव डिजिटलमा रुपान्तरण हुदैँ छन् । प्रविधि मैत्रि समयमा सेवाग्राहीको सहजताका लागि मन्त्रालय र मन्त्रालयका मातहतका कार्यालयहरुलाई डिजिटलमा रुपान्तर गर्ने कार्यको सुरुवात भएको छ ।
मन्त्रालयको स्थापन दिवशको अवसरमा बागमती प्रदेशको उद्योग, वाणिज्य, भूमि तथा प्रशासन मन्त्री शुकमाया तामाङले यसको सुरुवात गर्नु भएको हो । अव मन्त्रालयसगैँ मन्त्रालयका मातहतका कार्यालयहरु पनि डिजिटलमा जादै छन्  ।

कार्यसम्पादन राम्रो होस् भनेर डिजिटल प्रविधिमा लैजान लागेको उद्योग, बाणिज्य, भूमि तथा प्रशासन मन्त्री शुकमाया तामाङले बताउनु भयो । ‘यस मन्त्रालय र मन्त्रालय मातहतका कार्यालयहरुलाई पूर्ण डिजिटल बनाउने मेरो सपना हो,ु मन्त्री तामाङले भन्नु भयो– ‘प्रविधिको समयमा सेवाग्राहीको सहजताका लागि डिजिटलाईजको आवश्यक छ ।  
उद्योग मन्त्रालय र अन्तर्गतका सबै निकायलाई अनलाइन प्रणालीमा जोड्ने मन्त्रालयले जनाएको छ । मन्त्रालयको स्थापना दिवसको अवसर पारेर यस कार्यको थालनी गरिएको हो । डिजिटल बोर्ड मार्फत नागरीकले सेवा प्राप्त गर्ने विषयको जानकारी पनि गरिने छ । डिजिटल बोर्डमा कार्यालयबाट दिईने सेवाका वारेमा पनि जानकारी गराईने छ । जसले गर्दा सेवाग्राहीलाई सेवा दिन सहज हुने मन्त्रालयले विश्वास लिएको छ । यो सगैँ अव मन्त्रालयले सेवाग्राहीको हितका लागि एसएमएस स्टिम, अनलाईन बाट कार्य सम्पादन जस्ता प्रविधिको पनि विकास गर्दै लैजाने मन्त्रालयका सचिव राजेन्द्र के.सिले बताउनु भयो । मन्त्रालयले एक वर्षा पुरा गरेकाे अवसरमा कार्यक्रम गरेको  थियाे । कार्यक्रममा मन्त्रालयले एक वर्षमा गरेकाे गतिविधि डिजिटल मार्फत प्रस्तुत गरिएकाे  थियाे । 

बागमती प्रदेश सरकारले भदौ ४ गते सार्वजनिक बिदा दिने निर्णय गरेको छ । आजको प्रदेश सरकार मन्त्रिपरिषद् बैठकले गाईजात्रा पर्वका अवसरमा आगामी मंगलबार बिदा दिने निर्णय गरेको आन्तरिक मामिला तथा कानूनमन्त्री सुरजचन्द्र लामिछानेले जानकारी दिए ।

गाइजात्रा नेवार समुदायले मनाउने महत्वपूर्ण पर्व हो । गाईजात्रामा वर्षभरि दिवंगत भएका आफन्तको नाममा गाईको अनुहार र गणेशको चित्र अंकित गाई बनाएर शहर परिक्रमा गर्ने चलन छ । यसो गर्दा मृतात्माले यमलोक जाँदा बाटोमा पर्ने बैतरणी नदी सजिलै तर्छन् र मोक्ष मिल्छ भन्ने धार्मिक विश्वास छ ।

हेटौँडाः अनलाईन मार्फत् ठगीको अभियोगमा ९ जना भारतीय नागरिकलाई मकवानपुर प्रहरीले पक्राउ गरेको छ । हेटौँडा–४, पारिजातपथमा रहेको प्रमोद वाग्लेको घरको पाँचौं तला भाडामा लिएर अनलाईन मार्फत् ठगी गरेको अभियोगमा सोमबार साँझ ६ बजेको समयमा उनीहरुलाई पक्राउ गरेको जिल्ला प्रहरी कार्यालय मकवानपुरले जनाएको छ ।

मेडि असिष्ट नामको कम्पनी मार्फत् अनलाईन ठगी कार्य भइरहेको सूचनाका आधारमा उनीहरुलाई पक्राउ गरिएको जिल्ला प्रहरी कार्यालय मकवानपुरका प्रमुख सीताराम रिजालले जानकारी दिनुभएको छ । उहाँका अनुसार पक्राउ पर्नेहरुमा भारतको पटनाका ५७ बस्ने २८ वर्षीय नवनित कुमार, झारखण्डका २७ वर्षीय शाहरुख खान, बिहारका २९ वर्षीय कुन्दन कुमार, उत्तारखण्डका २६ वर्षीय आशिष कब्डौला, झारखण्डका ३४ वर्षीय विशाल कक्कड, झारखण्डका ३८ वर्षीय लोकेश कुमार दुवे, झारखण्डका २९ वर्षीय विकास कुमार सिंह, २८ वर्षीय अरुण कुमार, उत्तर प्रदेशका ४० वर्षीय कुनाल शर्मा रहेको प्रहरीले जनाएको छ ।

पक्राउ परेका उनीहरुको साथबाट विभिन्न कम्पनीका ल्यापटप ७ थान, राउटर ३ थान, मोवाईल १३ थान, हार्ड डिस्क १ थान, हेडफोन ४ थान, माउस २ थान, ल्यापटपका चार्जर १८ थान, वेब क्यामेरा १ थान, मेडी एसिस्ट डाईरेक्टर लेखेको स्ट्याम्प २ थान, मेडी एसिस्ट लेखेको स्ट्याम्प २ थान बरामद भएको छ ।

प्रहरी उपरीक्षक रिजालका अनुसार २०८० फागुन १० गते हेटौँडा उपमहानगरपालिकाको कार्यालयमा भारत पुष्प बिहार जिल्ला नयाँ दिल्ली स्थायी बसोबास गर्ने द्रबिन कुमार सिंहको नाममा मेडि असिष्ट कम्पनी दर्ता गरिएको छ । परामर्श सेवा प्रदान गर्ने गरी वाग्लेको घरमा फ्ल्याट भाडामा लिई संचालन गर्दै आएको प्रारम्भिक अनुसन्धानमा खुलेको छ । सिंहले आन्तरिक राजश्व कार्यालय हेटौँडाबाट मेडि असिष्ट कम्पनी देखाएर मानव स्वास्थ्य सम्बन्धी सेवा प्रदान गर्ने गरी पान नम्बर दर्ता गरिएको र उक्त कम्पनीमा १२ जना व्यक्तिहरुलाई काममा राखेको बुझिएको प्रहरी उपरीक्षक रिजालले बताउनुभयो ।

१२ जना मध्ये ३ जना (द्रबिन कुमार सिंह, रजत शर्मा र प्रकाश) फरार रहेको उहाँको भनाई छ । कम्पनीमा कार्यरत व्यक्तिहरुले १८ देखि ५० हजार भारतीय रुपैयाँ नगदमा तलब बुझ्ने गरेको खुलेपनि भुक्तानीको कुनै पनि अभिलेख फेला नपरेको प्रहरी उपरीक्षक रिजालले बताउनुभएको छ । भारतको राँचीस्थित मुख्य कार्यालयमा मेन सर्भर राखी क्विक कल क्लाइन्ट सफ्टवेयर मार्फत काम गर्ने गरेको खुल्न आएको उहाँले बताउनुभयो । सो सफ्टवेयर मार्फत टार्गेट ग्रुप पहिचान गरी सम्पर्क गर्ने र सम्पूर्ण विवरण भारत ट्रान्सफर गर्ने गरिएको प्रहरी उपरीक्षक रिजालको भनाई छ ।

अनुसन्धानका क्रममा कम्पनीद्वारा कुनै पनि आर्थिक कारोबार कानून बमोजिम नगरिएको र अभिलेखीकरण नभेटिएको उहाँले बताउनुभयो । उक्त कम्पनिबाट हुने गरेको काम कारवाहीको डाटा समेत हेड अफिसको सर्भरमा राख्ने गरेको उहाँको भनाई छ । सो कम्पनीले अधिकांश रातको समयमा मात्र काम गर्ने गरेको अनुसन्धानमा खुलेको उहाँले बताउनुभयो ।

पक्राउ परेका उनीहरु माथि मुलुकी अपराध संहिता, २०७४ को परिच्छेद २१ को दफा २४९ को उपदफा (१), (२) विपरित कसुर अपराध गरेको मुद्दा दायर गरी मकवानपुर जिल्ला अदालतबाट १० दिनको म्याद थप गरी अनुसन्धान भइरहेको प्रहरी उपरीक्षक रिजालले बताउनुभयो । उनीहरु माथि सोही ऐनको परिच्छेद ३ को दफा ३४ को उपदफा ३ बमोजिम दण्ड सजाय माग गरी मुद्दा दर्ता गरिएको छ ।

काठमाडौँ। हस्तकला क्षेत्रको विकासको लागि कानून निर्माण गरेर अघि बढ्ने बागमती प्रदेशका उद्योग, वाणिज्य, भूमि तथा प्रशासन मन्त्री शुकमाया तामाङले बताउनु भएको छ । आईतवार नेपाल हस्तकला महासघंले काठमाण्डौंको थापाथलीमा आयोजना गरेको अन्तरकृयात्मक कार्यक्रममा यस्तो बताउनु भयो ।

हस्तकलाको विकासको लागि नियमकानुनको आवश्यक देखिएको छ मन्त्री तामाङले भन्नुभयो – “तपाई विज्ञहरुसगँ बसेर छलफल गरेर विदेक निर्माणमा मन्त्रालय लाग्ने छ ।” युवाहरुलाई, महिलाहरुलाई स्वारोजगारमा जोड्न सक्ने भएकाले हस्तकाला क्षेत्रलाई अगाडी बढाउन आवश्यक रहेको पनि मन्त्री तामाङले बताउनु भयो ।

हाम्रो आफ्नै गाउँघरमा रहेको सामाग्रीहरुलाई कलात्मक ढंगमा प्रस्तुत गर्ने र तिनलाई बजार खोजि आम्दानी वृद्धि गर्न यसले महत्वपूर्ण भूमिका निर्वाह गर्ने पनि मन्त्री तामाङले बताउनु भयो । उहाँले भन्नुभयो- “हस्तकलाबाट सिर्जित सामाग्री निर्यात गर्दा आर्थिकमा टेवा मिल्ने छ । “

बागमती प्रदेशको भौतिक पूर्वाधार विकास मन्त्रालयले विपद्बाट प्रभावित सडक शिघ्र सञ्चालनका तथा क्षति न्यूनीकरणका लागि द्रुत प्रतिकार्य टोली (क्यूआरटी) गठन गरेको छ । बुधबार एक समारोहका बीच मन्त्रालयले विपद् प्रभावित सडकहरुको अवस्था सुधार गर्ने तथा नागरिकहरुको यात्रा सहज बनाउन क्यूआरटी गठन गरी कार्य प्रारम्भ गरेको हो ।

प्रदेशको १३ जिल्लामा पहिचान भएको प्रादेशिक सडकहरुमा भएका विपद्का घटनाबाट सडक पूर्वाधारको क्षति विवरण संकलन, न्यूनीकरण तथा प्रतिकार्य लगायतका काम क्यूआरटीले गर्ने मन्त्रालयका सचिव अमृत श्रेष्ठले जानकारी दिनुभयो । उहाँका अनुसार क्यूआरटीको संयोजकमा यातायात पूर्वाधार निर्देशनालय, हेटौँडाका निर्देशक पुस्कर प्रसाद पोखरेल रहनुभएको छ । क्यूआरटीको सदस्यमा मन्त्रालयका महाशाखा प्रमुख सिनियर डिभिजनल इन्जिनियर सुजन भण्डारी, मन्त्रालयका विपद् फोकल पर्सन ज्यानेन्द्र प्रसाद पुन, यातायात पूर्वाधार निर्देशनालयको निर्देशकले तोकेको अधिकृतस्तरको प्रतिनिधि हरिप्रसाद ओझा र सम्बन्धित जिल्लाको पूर्वाधार विकास कार्यालयका प्रमुख रहनु हुनेछ ।

टिमले अवरुद्ध भएका मुख्य प्रादेशिक सडकहरुको पहिचान गर्ने कार्य निरन्तर गर्ने, सूचना सम्प्रेषण गर्ने, वैकल्पिक मार्ग पहिचान गर्ने, आकस्मिक रुपमा अवरुद्ध सडकहरु यथाशीघ्र सुचारु गर्ने, अन्तर निकाय समन्वय गर्नेछ भने कार्यालयगत रुपमा आकस्मिक मर्मत सम्भार शीर्षकमा विनियोजित बजेटबाट स्रोत व्यवस्थापन गर्ने र प्रचलित कानूनको अधिनमा रही टोली स्वयम्बाट निर्धारित अन्य कार्यक्षेत्रगत शर्तहरुको कार्यान्वयन गर्नेछ ।

क्यूआरटी कार्य प्रारम्भ गर्नुहुँदै प्रदेशका भौतिक पूर्वाधार विकास मन्त्री अमन कुमार मास्केले जनसरोकारका सवालमा प्रदेश सरकार उत्तरदायी र जिम्मेवार ढंगबाट अघि बढेको बताउनुभयो । विगतमा हुँदै आएको प्रक्रियागत कामलाई प्राथमिकीकरण गरेर जवाफदेही र उत्तरदायी ढंगबाट अघि बढाउने प्रयत्न मन्त्रालयले गरेको उहाँले स्पष्ट पार्नुभयो ।

जनउत्तरदायी भूमिकाले काम गर्न मन्त्रालयले क्यूआरटी गठन गरेको उहाँको भनाई छ । प्रदेश सरकारले आम सरोकारका विषयमा स–साना काम प्रभावकारी ढंगबाट गर्न सके मात्र जनतालाई डेलिभरी दिन सकिने उहाँले बताउनुभयो । उहाँका अनुसार विशेषगरी क्यूआरटीले प्रदेश सडक गुरुयोजना (पिआरटीएमटी) मा रहेका २५० सडक आयोजनाको अवस्था, विपद् जोखिम र क्षतिका विषयमा अध्ययन, अनुसन्धान तथा प्रतिकार्यका लागि काम गर्नेछ ।

पूर्व भूमिसुधार राज्यमन्त्री रामचन्द्र रायको हत्या उनकाे जमिनका सँधियार वीरेन्द्र रायकाे निर्देशनमा भान्सेले गरेको प्रहरी अनुसन्धानबाट खुलेको छ ।
प्रहरीका अनुसार चन्द्रनगर गाउँपालिका–१, रतनपुर निवासी ४६ वर्षीय वीरेन्द्रले घटना हुनु केही दिनअघि पूर्व राज्यमन्त्रीको हत्या गरे नगद २ लाख रुपैंया दिने र व्यवसाय गर्न फर्म समेत बनाईदिने प्रलोभन देखाएपछि आफूले हत्या गरेको राम उजैनले बयानमा भनेका छन् ।
पूर्व राज्यमन्त्री रायले आफ्नो जग्गा मिचेर घर बनाएको, अन्य जग्गाहरु पनि मिचेको भन्ने आधारमा वीरेन्द्रले हत्या योजना बनाएको प्रहरी अनुसन्धानबाट खुलेको हाे ।
आज सोमवार साँझ जिल्ला प्रहरी कार्यालय मलंगवामा पत्रकार सम्मेलनकाे आयोजना गरि प्रहरीले अनुसन्धानकाे प्रगती विवरण सार्वजनिक गरेको हाे ।जिल्ला प्रहरी कार्यालय सर्लाहीका प्रमुख प्रहरी उपरीक्षक (एसपी )रविन्द्र बहादुर सिंहका अनुसार वीरेन्द्र र विगत एक दशक देखि पूर्व राज्यमन्त्री रायको भान्सा लगायतमा सहयोगीको रुपमा काम गर्दै आएका २५ वर्षीय राम उजैनलाई नियन्त्रणमा लिएर कार्बाही प्रकृया अगाडी बढाएको छ ।
उनीहरूलाई कर्तव्य ज्यान सम्बन्धी मुद्धामा सर्लाही जिल्ला अदालतबाट सोमवार नै १० दिनको म्याद लिएर थप अनुसन्धान अगाडी बढाईएको प्रहरी उपरीक्षक सिंहले जानकारी दिए ।प्रहरीलाई दिएको बयान अनुसार वीरेन्द्रकाे प्रलोभनपछि राम उजैनकाे हत्या भने एक्लैले गरेकाे देखिन्छ । राय निदाएको मौका छोपेर गत साउन ७ गते मध्यरातमा राम उजैनले फर्सा (कट्टा ) ले टाउकोमा प्रहार गरी हत्या गरेको प्रहरीले जनाएको छ।
राति १ बजे राम उजैनले नै प्रहरी तथा गाउँलेहरुलाई खबर गरेर घटनाबारे जानकारी दिएका थिए । यसअघि राम उजैनले प्रहरीलाई घटना भएको राती ९ बजेतिर अन्य ३ जना नचिनेका मान्छे आएपछि आफू सुत्न १ तले घरको छतमा गएको र मध्यरातमा उठेर हेर्दा पूर्व राज्यमन्त्री रायको हत्या भएर मृत अवस्थामा देखेको बताएका थिए ।
प्रहरीले घटना लगतै राम उजैनलाई नियन्त्रणमा लिएर अनुसन्धान अगाडी बढीको थियो ।
बयानमा कुराहरु बाझेपछि पोलिग्राफ मेशिनबाट उनी सहित अन्य केही व्यक्तिहरुको बयान समेत परिक्षण गराईएको प्रहरी उपरीक्षक सिंहले पत्रकार सम्मेलनमा जानकारी दिए ।घटनाको तेस्रो दिन हत्या गर्दा राम उजैनले लगाएको सेतो गञ्जी च्यातेर ३ वटा पोको पारेर बारी छेउको बाटोतर्फ फालिएको अवस्थामा प्रहरीले बरामद् गरेको थियो ।
राम उजैनकाे कपडा फेला परेपछि प्रहरीले पूर्व राज्यमन्त्री रायको हत्या राम उजैनले नै गरेको एकीन सहित थप अनुसन्धान अगाडी बढाकाे थियो ।
जिल्ला प्रहरी कार्यालय मलंगवाकाे टाेली, मधेश प्रदेश प्रहरी कार्यालय जनकपुरका प्रहरी निरीक्षक मोहन यादवको टोली र केन्द्रीय अनुसन्धान ब्यूरोको टोली घटनाको अनुसन्धानमा संलग्न रहेको जिल्ला प्रहरी कार्यालय मलंगवाले जनाएको छ ।

चितवनको भरतपुर महानगरपालिका २९ स्थित नारायणगढ मुग्लिङ सडकखण्डमा बस र तेलको ट्याङ्कर ठोक्किँदा १६ जना यात्रु घाइते भएका छन् ।
शनिबार दिउसो ३ बजेको समयमा नारायणगढ मुग्लिङ सडकखण्ड अन्तर्गतको भतेरी भन्ने स्थानमा बस र तेलको ट्याङ्कर एक आपसमा ठोक्किएका थिए ।
नारायणगढबाट पोखरातर्फ जाँदै गरेको ग २ ख १४०१ नम्बरको बस सोही दिशाबाट जाँदै गरेको ना ७ ख ५४९१ नम्बरको पेट्रोल ट्याङ्करको पछाडि ठोक्किँदा दुर्घटना भएको हो।

साउन १:मोरङको बेलबारी स्थित बनमा अलपत्र फेला परेका एक वृद्धको उद्दार भएको छ। आफ्नै छोराबुहारीले वनमा लगेर छोडिदिएका वृद्ध बावुलाई वन कर्माचारीले उद्धार गरेर अस्पताल भर्ना गरेको हो।
बेलबारी–चिसाङ साझेदारी वन क्षेत्रबाट आज ७० वर्षीय उमेर बताउने जामुनलाल झाँगडलाई चार दिनपछि आज उद्धार गरिएको हो । वन हेरालु टोलीले उनलाई उद्धार गरी स्थानीय अस्पताल भर्ना गरिएका छन् ।

उनको अहिले नगर अस्पतालमा उपचार भइरहेको छ। वृद्धको शरीरको भागमा चोट देखिएको र उनी धेरै बोल्न सक्ने अवस्था नरहेको बेलबारी नगरपालिका स्वास्थ्य शाखा प्रमुख सन्तोष विश्वकर्माले बताए । बेलबारी नगरपालिका–७, डाङ्गी टोलमा बस्दै आएका वृद्धका छोराबुहारीको खोजी भइरहेको छ।