आर्थिक

सिन्धुली:सिन्धुलीको हरिहरपुरगढीमा आज सिन्धुली उद्योग वाणिज्य संघको हरिहरपुरगढी गाउँपालिका शाखा गठन तथा कार्यालय उद्घाटन सम्पन्न भएको छ।हरिहरपुरगढी कार्यालयको सभाहलमा सिन्धुली उद्योग वाणिज्य संघको चौथो शाखा हरिहरपुरगढीमा गठनभएको हो। उद्घाटन समारोहमा बोल्नुहुदै प्रमुख अतिथि सिन्धुली क्षेत्र नम्बर २ प्रतिनिधि सभा सदस्य लेखनाथ दाहाल राजनले ”उद्योगमैत्री वातावरण निर्माण गर्न नवगठित शाखाले भूमिका खेल्नुपर्नेमा जोड दिनुभयो ।वहाले राष्ट्रिय पुँजी निर्माणमा लाग्न उद्योगी व्यवसायीहरुलाई आग्रह गर्नुभएको छ ।
मुलुकमा दलाल पुँजीवाद हाबी हुँदा राष्ट्रिय अर्थतन्त्र निर्माण हुन नसकेको उहाँको भनाइ छ । ‘नेपालमा उद्योग धेरै छैन । आयातमा निर्भर छ । भारतीय वस्तुले मात्रै ७२ प्रतिशत ओगटेको छ । आयातमा आधारित अर्थतन्त्र हाम्रो प्रमुख चुनौती हो,’ सांसद दाहालले भन्नुभयो । उहाँले उद्योगभन्दा बढी वाणिज्य भएको देशमा अर्थतन्त्र सबल नहुने भएकोले उत्पादनमा जोड दिनुपर्ने धारणा राख्नुभयो ।
हरिहरपुरगढी गाउँपालिकाका अध्यक्ष बज्रध्वज वाइबाले शाखा गठन गरेर मात्रै नहुने सक्रिय भएर लाग्नको लागि नवगठित समितिलाई आग्रह गर्नुभएको छ । उहाँले अव गाउँपालिका सहरीकरण तिर लम्कदै गरेकोले उद्योगी र व्यापारीले तदारुकताका साथ लाग्नको लागि आग्रह गर्नुभएको हो । गाउँपालिकालाई उद्योगमैत्री वातावरण निर्माणका लागि आवश्यक कानुन निर्माण र उद्योगीको सुरक्षाको निर्माणमा आफ्नोतर्फबाट पहल गर्ने प्रतिबद्धतासमेत उहाँले जनाउनुभयो ।

उद्योग वाणिज्य संग सिन्धुलीका अध्यक्ष अर्जुन कुमार श्रेष्ठले उद्योगमैत्री नीति, कानुन नहुनुका साथै उद्योगीको लगानी सुरक्षामा चुनौती रहेका कारण उद्योगको विकास हुन नसकेको बताउनुभयो । ‘उद्योग वाणिज्य संघले उद्योगमैत्री वातावारण बनाउन अगुवाई गर्नुपर्छ । उद्योगी बन्ने संस्कार सिकाउनुपर्छ, उद्योग स्थापनाका लागि सहयोग गर्नुपर्छ, विश्वासको वातावरण निर्माण गरिदिनुपर्छ,’ श्रेष्ठले भन्नुभयो । कार्यक्रममा प्रमुख प्रशासकीय अधिकृत दिपेन्द्र कुमार पैकरा, उद्योग बाणिज्य संघ सिन्धुलीका उपाध्यक्ष बिरबल चौधरी, उद्योग बाणिज्य संघ मरिणका अध्यक्ष चिनध्वज बम्जन, वडा अध्यक्ष तथा पार्टी प्रतिनिधि लगायतको उपस्थिती रहेको थियो ।

उद्योग बाणिज्य संघ सिन्धुलीको हरिहरपुरगढी शाखाको तदर्थ समितिको अध्यक्षमा कुल बहादुरभोलन,उपाध्यक्षमा टंक राई,पुष्पराज मोक्तान, सचिवमा सन्तोष आले मगर, सहसचिव श्रवण मुक्तान, कोषाध्यक्षमा सुनिल वाइबा सहित १३ जनाको समिति गठन गरिएको छ ।

सिन्धुलीको हरिहरपुरगढी गाउपालिका वडा नम्वर ३ गुर्जीमा प्रस्तावित ईलेक्ट्रोलाईसिस प्रविधीमा आधारित रसायनिक मल कारखाना स्थापनाको लागी पुर्व सम्भाव्यता अध्ययन प्रतिवेदन (Pre- Feasibility Study Report ) तयारीको लागी स्थलगत अनुगमन भएको छ। बागमती प्रदेशसभा सदस्य शुष्पा भुजेल काठमाडौं विश्वविद्यालय ग्रीन हाईड्रोजन ल्यावका टिम लिडर डा.विराज सिङ्ग थापा,डा.राम लामा, ई. लक्ष्मण लामा,ई.मानस घिसिङ,ई.अभिषेक खतिवडाका टिम तथा गाउँपालिका अध्यक्ष बज्रध्वज वाईबा ,प्रमुख प्रशासकीय अधिकृत दिपेन्द्र कुमार पैकरा,नेपाल लोकतान्त्रीक आदिवासी जनजाती महासंघका केन्द्रिय सदस्य मोहनलाल तामाङ,निवर्तमान उपाध्यक्ष अनिता कुमारी राई,वडा अध्यक्ष शाखागत कर्मचारी,महाचाड ईन्टरनेशनलका प्रतिनिधि राकेश महर्जन सहित काठमाण्डौ विश्व बिद्यालयका प्राविधिक टोली द्बारा स्थलगत अनुगमन तथा निरिक्षण कार्य सम्पन्न भएको हो ।

हरिहरपुरगढी गाउपालिका र काठमाडौं विश्वविद्यालय विच वडा नम्वर ३ गुर्जीमा प्रस्तावित ईलेक्ट्रोलाईसिस प्रविधीमा आधारित रसायनिक मल कारखाना स्थापनाको लागी पुर्व सम्भाव्यता अध्ययन प्रतिवेदन (Pre- Feasibility Study Report ) तयारीको लागी २०८१ साउन २७ मा सम्झौता भए बमोजिम स्थलगत अनुगमन भएको हो।
हरिहरपुरगढीमा उद्योग सञ्चालनमा आएमा स्थानीयको जीवनस्तर माथि उठ्ने पालिका अध्यक्ष वाइबाले बताउनु भएको छ।
प्रस्तावित औद्योगिक क्षेत्रका लागि गाउँपालिकाले एक स्थानमा दुई सय २० बिगाहा र अर्को स्थानमा दुई सय ४० बिगाहा गरी जम्मा दुई स्थानमा तीन सय ६० बिगाहा जग्गा छुट्याएको र हालसम्म उक्त स्थानमा उद्योग नरहेको बताइएको छ । उद्योग सञ्चालनपछि दुई सयले प्रत्यक्ष र हजारौँले अप्रत्यक्ष लाभ लिनसक्ने बताइएको छ ।

झनझने मंसिर २, झनझने: सिन्धुलीको हरिहरपुरगढी गाउँपालिकामा नेपाली हाइब्रिड मकैको बीउको परीक्षण उत्पादन सुरु गरिएको छ । आइतबार जिल्लामै पहिलोपटक गाउँपालिकामा बीउ उत्पादनका लागि परीक्षण सुरु गरिएको हो ।

बीउ विजन गुणस्तर नियन्त्रण केन्द्र हेटौंडाले आइतबार गाउँपालिकाको एक हेक्टर जमिनमा हाइब्रिड मकैको बीउ रोपेको छ । केन्द्रका प्रमुख राजन ढकालको उपस्थितिमा नेपाल कृषि अनुसन्धान परिषद् (नार्क) अन्तर्गतको राष्ट्रिय मकैबाली अनुसन्धान कार्यक्रम रामपुर चितवन नेपालका वरिष्ठ बैज्ञानिक डाक्टर महेन्द्रप्रसाद त्रिपाठी, अर्का वैज्ञानिक मनोज कँडेल तथा बाली विकास अधिकृत सिर्मला योन्जनसहितको विज्ञ टोलीले बीउ रोपेको हो ।
आइतबार रोपिएको बीउ आरएमल–१८ नामको भाले जातका मकैको भएको जानकारी दिइएको छ । भाले जातको मकैको बीउ रोपेको तीन दिनमा मात्रै आरएमल–१५० नामको पोथी जातको मकै रोपिने विज्ञ टोलीको भनाइ छ ।

भालेको धानचमरा आउने समय र पोथीको सुत्ला आउने समय एउटै होस् भनेर तीन दिनको फरकमा रोपिने केन्द्रका प्रमुख ढकालले बताउनुभयो । “भाले मकै भन्नाले मकैको धानचमरा र पोथी भन्नाले मकैको सुत्लालाई बुझिन्छ । भाले र पोथीको क्रसबाट हाइब्रिड उत्पादन गर्छौं । दुई फरक प्रजातिको बीउ लगाउँछौं । पोथी जातको मकै वृद्धि हँदै गर्दा धानचमरा पूरै हटाउँछौं । यसरी भाले र पोथी क्रसिङबाट उत्पादन हुने बीउ ’हाइब्रिड बीउ’ हुन्छ । अर्को सिजनमा सोही बीउ लगाउँदा धेरै उत्पादन हुन्छ,” प्रमुख ढकालले भन्नुभयो ।

कृषि विकास कार्यालय सिन्धुली र हरिहरपुरगढी गाउँपालिकाको तदारुकतामा पहिलोपटक सो गाउँपालिकामा नेपाली हाइब्रिड मकैको बीउ उत्पादन सुरु गरिएको उहाँले बताउनुभयो । “हाइब्रिड बीउ उत्पादनका लागि यो ठाउँ उपयुक्त छ । यहाँ अन्य मकै पनि उत्पादन राम्रो देखेका छौँ,“ उहाँले भन्नुभयो । यो पटक उत्पादन भएको बीउ अर्कोपटक गाउँपालिकाका सम्पूर्ण कृषकलाई वितरण गर्न पुग्ने प्रमुख ढकालले बताउनुभयो ।

हरिहरपुरगढी गाउँपालिकाका अध्यक्ष बज्रध्वज वाइवाले जिल्लामै पहिलोपटक हरिहरपुरगढीमा परीक्षण सुरु हुनु सकारात्मक भएको बताउनुभयो । उहाँले यो परीक्षण सफल भए पालिकालाई मकै उत्पादनमा आत्मनिर्भर बनाउँदै आर्थिक उपार्जनमा जोड्ने धारणा व्यक्त गर्नुभयो ।
अन्य अन्नबाली उत्पादन बढाउनका लागिसमेत परीक्षण गरिदिन अध्यक्ष वाइवाले विज्ञ टोलीसँग अनुरोध गर्नुभयो । गाउँपालिकाका प्रमुख प्रशासकीय अधिकृत दिपेन्द्रकुमार पैकराले यस्ता कार्यका लागि आवश्यक सामग्रीको व्यवस्था गरिने बताउनुभयो ।